اسألوا أهل الذكر

الثلاثاء، 8 مايو، 2007

حرمة المسجد وكليب أنغام

السلام عليكم ورحمة الله وبركاته
تحديث
أعتذر عن التأخر في التدوين بسبب الانطحانات
اللهم اجعل الامتحانات بردا وسلاما على قلوبنا
دعواتكم مع كل اللي بيمتحنوا يا اخواننا
__________________________________________
قال الله تعالى في سورة النور
حقا ان هؤلاء هم الرجال
مالبثت حينها أن تذكرت قول الله عز وجل
وَمَنْ أَظْلَمُ مِمَّنْ مَنَعَ مَسَاجِدَ اللَّهِ أَنْ يُذْكَرَ فِيهَا اسْمُهُ وَسَعَى فِي خَرَابِهَا
خير يا عم بس ايه اللي حصل
في مسجد "سبيل أغا السلحدار" بالجمالية
فجر يوم 24/4/2007
قامت المطربة المصرية الشهيرة "أنغام" بمرافقة فرقتها الراقصه بتصوير فيديو كليب جديد
مش كده وبس
تم تأجير ساحة المسجد الأثرية مقابل6000 جنيه تم إيداعها في خزينة إيرادات الآثار
أوصلت المهزلة إلى هذا الحد
إيجار المساجد للعري والفحش والرقص وعلى مرأى ومسمع من الجميع
أوصل الأمر أن تدخل شبه عارية إلى بيت من بيوت الله كي ترقص وتغني
قديما قالوا قردا يدنس مسجدا
فلست أدري ما أقول حاليا
وأترك الخبر بلا تعليق
حسبنا الله ونعم الوكيل
حسبنا الله ونعم الوكيل
حسبنا الله ونعم الوكيل
أسألكم الدعاء ...... البوسطجي 2

الجمعة، 4 مايو، 2007

فضائح اللجنة العالمية للمرأة

السلام عليكم ورحمة الله وبركاته
كل يوم نلاقي الحاجه زيزي طالعة في التليفزيون وتنادي بحرية المرأة
تاني يوم نلاقي أم السعد تطالب بوقف إذاعة أغنية ادي الواد لأبوه والسح اندح امبو
تالت يوم نلاقي المحاميه سنيه جنح تطالب بمساواة الرجل والمرأة في الميراث
لدرجة ان أنا بقيت خايف أصحى في مرة ألاقيهم يقولوا
هما ليه الرجاله مش بيحملوا زينا ومش بيرضعوا
يا عم الحاج اهدى بس وقول لنا ايه اللي جد يعني
ما احنا كل يوم بنسمع الحاجات دي
افعص هنا واقرأ معايا
اللجنة العالمية لمركز المرأة تطالب
قال ايه خير اللهم اجعله خير
بممارسة الجنس الآمن والمثالي للمراهقين وتجريم عذرية الفتاة
كما أنه مطلوب من المسلمين والمسيحيين التعاون لمواجهة هذا التيار
أنا نفسي أفهم بس
مين اللي فوض الناس دي انهم يتكلموا بلسان المرأة
لو هي دي الحرية مش عاوزينها
اللي نفسي أفهمه مين اللي وراهم علشان يخاطبوا دول
اقرأ الفقرة دي
حيث تطالب جميع الدول الأعضاء بالأمم المتحدة بالتوقيع عليها وضمان تطبيق ماورد فيها.
وخد عندك دي كمان
وقد بلغ تدخل التقرير في شئون الدول مواد في الفقرة 49 عندما اعتبر ان الدين خاصة في الدول التي يعتبر فيها اساسا للتشريع يحد من فرص المساواة ويزيد من العنف، وطالب بجهود ضخمة لتغيير المعتقدات والأعراف التي تدعو لذلك،
سيبك من كل ده
تعالى بقى نشوف مع بعض هما عاوزين ايه
توفير معلومات الصحة الجنسية للطفلة وتوفير احتياجيات الصحه الانجابيه للمراهقين وتعليمهم الجنس الآمن
طبعا لا تعليق
تعرض لحقوق الشواذ في الفقرة 96 تحت عنوان 'الفتيات السحاقيات' فأكد علي الحفاظ علي الحق في تحديد الهوية الجنسية للفتيات أي أن تختار الفتاة جنسها وتختار جنس الشريك ومراعاة حق الشاذات في التعبير عن آرائهن حول الشذوذ وحقهن في الحصول علي شركاء مثلي الجنس لهن
واعتبر ان التركيز الشديد علي عذرية الفتاة كبتا جنسيا وشكلا من أشكال التمييز ضد الطفلة الأنثي،
طبعا كلنا مؤمنين ان القرآن قال
"الرجال قوامون على النساء بما فضل الله بعضهم على بعض"
نشوف بقى التقرير
تعرض التقرير لما أسماه الهياكل الطبيعية في ادارة البيت اشارة الي القوامة،
حيث جاء فيه انها تمنح الحقوق والقوة للرجل أكثر من المرأة ممايجعل النساء ذليلات تابعات للرجال،
واعتبر هذه القوانين تحد من قدرة المرأة علي التطور الاقتصادي خاصة قوانين الميراث وطالب بالمساواة التامة فيها بين النساء والرجال،
واعتبر التقرير في الفقرة 49 منه ان المهر شكل من أشكال العنف ضد الفتاة وأسماه ثمن العروس، وطالب بسن قوانين تمنع المهر،
بل ان عمل الفتاة دون الثامنة عشرة في منزل أهلها يعتبره التقرير أحد أسوأ أشكال عمالة الأطفال وطالب منظمة العمل الدولية بتجريمه دوليا واعتباره عنفا ضد الطفلة
أنا لحد دلوقتي مش عارف الناس دول بيفكروا ازاي
ولا عاوزيين مننا ايه
وبأي صفه انهم يطالبوا بتطبيق قوانين وتعديلات في الأعراف
مين اللي أعطاهم الحق ده
لو كانت هي دي حرية المرأة فأقسم بالله أن المرأه المسلمة تستحي أن تقرأ مثل هذا الكلام لا أن تطالب به
دمتم بكل ود
أسألكم الدعاء ..... البوسطجي 2

الأربعاء، 2 مايو، 2007

فـــن التعامــــــل

السلام عليكم ورحمة الله وبركاته
طبتم وطاب ممشاكم وتبوأتم جميعا من الجنة إخوة الخير منزلا
كتير جدا دلوقتي بنسمع كلمة اتق شر من أحسنت إليه
كتير بنسمع من الناس الملتزمين اللي يقول ان أنا بعامل الناس كويس
بس مش بلاقي معامله بالمثل
لدرجة ان أنا مش عارف أتعامل زي ما أنا ولا أعاملهم زي ما بيعاملوني
قد يتفق معي البعض وقد يختلف آخرون
لكنها الحقيقة من وجهة نظري
يا جماعه احنا قاعدين نقول ان الناس أصبحوا وحشين ..
ما فيش أمان ولا أمانه..
مافيش تقدير للي احنا بنعمله..
ما فيش حب .. ما فيش حنان .. ما فيش أمل
الدليل على وجود الحاجات دي انتم
اتفقتوا على الحاجات دي
رغم اختلاف أماكنكم وانتمائاتكم
يبقى ازاي مش موجوده
أنا معاكم ان كتير بنعطي وما نلاقيش
بس تصدقوا
متعة العطاء ألا تنتظر المقابل
أعلم أن الكثيرين سيقولون أني أعيش في عالم المثاليه وووو
لكنها حقا متعة
المتعة ألا تنتظر المقابل من البشر
لانه مهما كان سيكون به تقصير
المتعه أن تنتظر المقابل من الله
يا جماعه احنا كل حياتنا لله
الحركة والسكنة .. الكلمة والجملة كلها لله
الرسول صلى الله عليه وسلم لما وضع اليهودي الشوك أمام بيته
وفي يوم الرسول لم يجد الشوك
سأل عن اليهودي
ولما علم انه مريض ذهب وزاره
ده في رايي لسببين
الأول طبعا ابتغاء مرضاة الله
الثاني لان الإسلام نزل لمداواة القلوب والتأليف بينها
الرسول صلى الله عليه وسلم لم يغضب لنفسه قط إلا إذا انتهكت حرمات الله
هي دي أخلاقنا يا اخواننا
أخلاق الإسلام
اللي ارتضينا في يوم ان احنا نحملها ونتعامل بيها
ولو كنا شايفين ان الناس في الزمن ده ما يستاهلوش وما يستحقوش
أعتقد انهم أولى من اليهودي جار الرسول صلى الله عليه وسلم
وتاني هقول متعة العطاء ألا تنتظر المقابل
هي دي أخلاقنا ومش هنغيرها
حقا انها الحقيقه
بعد كل هذه الأفكار التي تراود الإنسان
الحقيقه ان النفس السليمه بتسكن بذكر الله
وان المقابل أو النظير هو رضا الله
وفعلا وقتها لو استشعرنا ده
ستقر نفسي بالسكينة ناسيا ...... ما كان لي في الناس من ثورات
كثيرا ما ينتاب بني البشر أحاسيس غريبه
منها ما يخصه ويعنيه ومنها ما يخص الناس
حقا انها صادقه
لكن الدور دور الإنسان نفسه ولا أحد سواه
دور المرء أن يضعها في المضمار الأصح
لا المضمار الصحيح
دورك انت ان انت تضع انفعالاتك في طريق صح
وأعتقد ان
كسب القلوب أولى من كسب المواقف
عارف ان ممكن تقول ان أنا معقد أو ان أنا عايش عالم المثاليه في الكون
القرآن الكريم لما نزل واتكلم عن الإنسان أو الناس
في كل مواضع القرآن كانت ذم بني الإنسان
"إنه كان ظلوما جهولا ".. " كفارا" وغيرها وغيرها
الإسلام لما نزل نزل علشان يخرجنا من آدميتنا علشان يوصلنا للإيمان
ولو عشنا فعلا الحلاوة دي
حلاوة الإيمان
كل مشاكلنا هتتحل
لو كل واحد فينا بدأ يصلح من نفسه الكون هيتصلح
وهرجع أقول
متعة العطاء ألا تنتظر المقابل إلا من الله
هداكم الله وبياكم وثبت على طريق الحق خطاي وخطاكم
ورزقنا الإخلاص في القول والفعل والعمل
اللهم آمين
دمتم بكل ود
أسألكم الدعاء ......البوسطجي 2