اسألوا أهل الذكر

الجمعة، 28 مارس، 2008

العزوبية تاج على رؤوس العزاب لايراه إلا المتزوجون !!

السلام عليكم ورحمة الله وبركاته
في زحمة القضايا التي تشغل الانسان ، وضيق الوقت الذي يلاحقه لابد وأن يكون له وقت يختلي به مع نفسه ..
ربما قضاه في " البوح " مع من أحب .. أو في جلسة مصالحة مع النفس أو الأهل أو الأحباب ..
رحم الله أمير المؤمنين حين قيل له " خفت أن أوقظك يا إمام " ..
فقال وكيف أنام هانئ البال ؟!! .. فإن نمت بالنهار ضاعت رعيتي .. وإن نمت بالليل ضاعت نفسي ..
وهكذا الحياه إن نمت بالنهار ضاعت قضايانا وأمتنا وأعمالنا ودراستنا ....
وإن غفلت عن نفسي .. ضاعت !!
ومع فاصل من الصداع واجابات على " تاج " من قلب أبيض أسأل الله أن يوفقني للاجابة عليه ،،،،
------------------------------------
ما رأيك في الجملة التي تقول .. العزوبية تاج على رؤوس العزاب لايراه إلا المتزوجون ؟
أختلف ،،،
الزواج مش بس مجرد ورقة مأذون تكتب والتزامات لابد وأن تؤدى وإلا فالخلع أو الطلاق .. في الحالة دي تبقى أحد أنواع " البهيمية " ليس إلا ..
وعلشان نعرف نحدد دي يبقى لازم نسأل نفسنا احنا ليه بنتزوج .. ونشوف نوايانا ..
لو علشان ال" 5 ع " ،، يبقى طمع ،،
لو علشان دي سنة الحياة وبس ،، يبقى تقليد أعمى
لو علشان مجرد اني أحس اني كبرت وبقيت مسئول ،، يبقى سفه
عمر ماكان الزواج حاجه هامشية أو عذاب إلا لو احنا اللي اعتبرناه كده ،،،،
--------------------------------------

ما هى العوائق من وجهة نظرك التى تحول بين الشباب والزواج هذه الايام ؟؟؟
أولها من وجهة نظري .. تأهيل الشباب ،، في وسط سياسة التغريب اللي بنعيشها بقى حلم كل شاب " بنت " مش " زوجة " .. ودي في حد ذاتها مصيبة بتفقد الشاب الثقه في نفسه .. بل وبتفقده الثقه في جنس البنات كلية لانه هيشك ان كل البنات زي اللي كان بيمشي معاها ،،،
ثانيا نتق الله في الماديات ،،،
كتير أوي بنتكلم وان حرام بجد الشباب هيجيب منين ،، ولما حد يتقدم لأختي أسلخه طلبات وأخليه يكره اليوم اللي فكر فيه انه يتجوز !! منطق غريب ..
ارحم تُرحَم ،،
هييجي يوم هتتجوز ومش هتلاقي برضه
لو كل واحد مننا بدأ ببيته واخواته ويوصل وجهة النظر دي لأهله .. ان زي ما بتعمله هيتعمل فيكم ،، ان شاء الله هنلاقي تغيير .. بس نصدق النية ونعمل بجد بدون خوف ،، لان وقتها هتيجي على دماغك انت مستقبلا ،،،
--------------------------------------------

من وجهة نظرك هل النكد موجود فى العزوبيه ام فى الزواج ؟ ولماذا ؟
النكد هي حالة نفسية مرتبطة بأحداث وقناعات وظروف وطريقة تعامل مع المشكلة ..
بمعنى ان هي حالة فردية لا تطبق على الكل ،،،
والعلاقات الانسانية عموما بنقسمها ل 4 أجزاء
أ) المنطقة المعلنة : ودي معروفة لكل من الفرد والمجتمع .. مافيش مشكلة في دراستها .
ب) المنطقة العمياء: معروفة للمجتمع لكن الفرد لا يعرفها
ج) المنطقة الخفية : دي اللي يعرفها الفرد .. ولا يعرفها المجتمع .
د) المنطقة المجهولة : لا يعرها الفرد ولا المجتمع
وبالتالي يصعب تحديد اجابة على سؤال زي ده بسهولة ،،،
لكن عموما النكد هي حاجه بايدينا نخلقها كل لحظه وبايدينا نمحوها من حياتنا باليقين والايمان والحب ،،،
-----------------------------------
ما الحل من وجهة نظرك لمشكلة (( العزوبية )) فى مصر ؟؟
ممكن اكون عرجت على الحل في السؤال الثاني ،،،
أضيف بس التوكل على الله وحسن الخلق
------------------------------------
من وجهة نظرك ....هل للعزوبية مميزات وعيوب ؟؟؟
بالطبع ،،،
لكل عمل أو فعل مميزات وعيوب لكنها بتختلف من شخص لآخر ومن مجتمع لآخر ..
المهم هل هنقدر نتغلب على العيوب ونكسب منها نقاط ايجابية ولا هنتعامل معاها بسلبية ..
لو هنتعامل بسلبية والمشاكل أو العيوب دي هتوقفنا ،، يبقى بلاش نفكر فيها أصلا ،،
أما لو هناخد منها عبرة ودرس وتقدمنا يبقى نبدأ ندور عليها ..
رحم الله امرئا أهدى اليّ عيوبي .. كلمة عمر بن الخطاب - رضي الله عنه -
هو نفس المنطق .. ان العيوب أو العوائق دي ممكن تكون سبب كبير أوي للتغيير ،،،
---------------------------------
ما هو رأيك فى انشاء مدونة (( رابطة )) للعزاب من المدونين ؟؟؟
هي موجوده فعلا بس بقالب ساخر .. مدونة عايزه أتجوز ومدونة بيت العرايس والعرسان
المدونه بجد جميله وفكرة " مفتكسة " :D
لكن مش هي الحل يعني ،،،
الحل ان احنا نشتغل عملي شوية ونوعي الشباب بالقضية
ممكن المدونه تكون أحد وسائلها لكنها أبدا لا ترتقي لكونها غاية ان احنا نجمع " العزاب " يعني ونقعد نغني أغاني " العذاب " .. ولا ايه ؟!
---------------------------------
أخيرا ....لمن تمرر هذا التاج ...على الأقل خمسة ؟؟؟
لرابطة مدوني الدلتا كاملة ..
كل مدوني مجموعة المدونين العرب
المدونات اللي عندي في " مكاتب بريد صديكه "
أسألكم الدعاء ،،،،

هناك 12 تعليقًا:

ِِAdem El-Mahdy يقول...

السﻻم عليكم

اول واحد ببصم يا بوسطجى

اجابات دبلوماسية جداا

و قوية فعﻻ

بس خلص بس انت دراستك و احنا نشوفلك ولحدة كده تكون زيك
و اعتقد صعب حبتين لكن نعملك سيرش

و ان شاء الله هتشوف رد على التاح ده عندى اقوى منك

و بس
و سﻻم عليكم

elbostagy2 يقول...

السلام عليكم ،،
منور يا هندسه
أخبارك يا حبي

كلام جميل ،، يعني كده بصماتك على الحيطان ونقدر نبلغ واحنا مطمنين :D

ركز انت بس في الميد تيرم واحنا نجيب لك عروسه هابله:D

هايله هايله مش هابله :D
نورتني يا كبير :)

عبدالرحمن فارس يقول...

طبعا ياباشا انا متفق معاك

الجواز اصلا رفاهيه لا يجوز التفكير فيها


محبتي

قلب أبيــض يقول...

جزاكم الله خيرا
حبيبى
واخويا

وبسم الله اجابات فرحتنى ...وعجبتنى ...
دبلوماسى من يومك

مش بعيد عليك



ان شاء الله هنقولك قريب ...يا سعادة السفير

تقبل تحياتى

اخوكم ..احمد سعيد
قلب ابيض

Hosam Yahia حسام يحى يقول...

ايه الحلاوه دى


يا عم ماتستعجلش على الجواز بكره تقرف

وتتمنى ترجع اعزب ومعذب

تقبل تحياتى

elbostagy2 يقول...

عبد الرحمن بك ،،
منور يا كبير

جواز ايه يا ريس ؟!
سيبك انت
تشرب حشيش :D

elbostagy2 يقول...

قلب أبيض ،،،

جزاكم الله خيرا على تمرير التاج يا أبو حميد

دبلوماسي مين ياعم
اسكت لأبو العيط يسمعك :D

elbostagy2 يقول...

حسام يحيي ابن بلدي
وين أراضيك يا ابني ؟!

الجواز عمره ماكان قرف الا لو احنا اللي حولناه لكده يا حبيبي :)

Batoot_lasa bafakr يقول...

السلام عليكم
يعنى موضوع حلو
بس انت بتقول هيه هبله هبله ازاى بقه تتزوج هبله ممكن تستنى لما تعقل تكون انت اتعديت
هههههههههههههههه
ارجو عدم المديقه من التعليق
سلام

Batoot_lasa bafakr يقول...

السلام عليكم
يعنى موضوع حلو
بس انت بتقول هيه هبله هبله ازاى بقه تتزوج هبله ممكن تستنى لما تعقل تكون انت اتعديت
هههههههههههههههه
ارجو عدم المديقه من التعليق
سلام

Batoot_lasa bafakr يقول...

السلام عليكم
يعنى موضوع حلو
بس انت بتقول هيه هبله هبله ازاى بقه تتزوج هبله ممكن تستنى لما تعقل تكون انت اتعديت
هههههههههههههههه
ارجو عدم المديقه من التعليق
سلام

نور الاسلام يقول...

السلام عليكم
اجابات مميزه
ربنا يوفقك
جزاك الله خيرا
في رعاية الله
السلام عليكم